ضحكوا عليك يا مصري 2

عمي مصري راجل عاطفي وطيب وبيصدق بسرعه ... لما بيشوف الناس اللي متلمعه ومتألفطه ومتقعره في لغتها ... يخرجوا علينا وبيقولوا كلام جامد قوي عن توفير رغيف العيش وعن محاربه الغلاء وبيع الدقيق في السوق السوده(زي سنينهم طبعا) كلام جامد ورنان وبياخذ بالقلوب والابصار (وان يقولوا تسمع لقولهم) ... عمك مصري صاحب عيال يعني كتيبه اعدام ياكلوا الزلط (دا لو وجدوا الزلط اصلا) الراجل يوميا محتاج عدد من العيش ومضطر اسفا الي ان يذهب الي حلبه المصارعه في الحصول علي العيش ... عمي مصري بيقوم من النجمه يذهب الي فرن العيش والراجل يقف في الطابور مؤدب ومنتظر دوره . وهو واقف شاف عجب. شوله الدقيق عماله بتتسرب الي خارج الفرن ولما سال ايه ده قالوا له خليك في حالك يعني انت اللي حتصلح الكون وحنعمل ايه وكده يعني من الكلام اللي المصريين بيصبروا به انفسهم علي الغلب ... وعمي مصري برضوا واقف في الصف شاف طوله عيش وراها طوله عيش كل شويه طوله داخله فاضيه طالعه مليانه !!! تعجب ... وبعد شويه واحد واخد كيس عيش مفرود وميه ميه.... وبعد شويه واحد يدفع فلوس وياخذ عيش ... وبعدين يا عم مصري؟؟؟ الراجل كلم واحد قدامه في الصف امال مين دول اللي عمالين ياخذوا عيش ويمشوا قال له الاول عضو مجلس محلي والثاني قريب فلان المهم (اللي بيظبط بيع الدقيق) والثالث مفتش التموين .... صرخ عمي مصري وقال اذا كان دول اللي مفروض يراقبوا العمليه من اولها بيعملوا كده امال مين اللي حيحل المشكله ... عمي مصري قال للراجل قدامه سيبك من دول طب فين الجهات العليا فين الفكر الجديد ؟ عندها نظر الرجل الي عمي مصري ضاحكا ومستغربا وقال له تاني يا عم مصري صدقت الكلام ... يا عم دا فكر الهمبكه